Арво Метс
[1937 – 1997 вояс]

 
Чужис Эстонияын, Таллин карын. Эст вужъя роч кывбуралысь, эст кыв вылысь вуджӧдчысь. Бура дыр олiс Москваын, кӧн уджалiс «Новый мир» журналын. Ӧтчыд, 1996 вося вӧльгым тӧлысьын, сыктывкарса гижысь Сергей Журавлёвлӧн корӧм вӧсна, сiйӧ волiс Сыктывкарӧ, кӧнi аддзысьлiс литературнӧй йӧзкӧд. Сэки жӧ козьналiс меным ассьыс «Таллинса изъяс» кырымпаса вӧсньыдик небӧгсӧ. Сэтысь ме и вӧчи некымын вуджӧдӧм...

    • «Молодые девушки...» (стр. 4 / 7)
    • «Где взять...» (стр. 16 / 30)
          Арво Метс. «Таллинские камни». Стихи и переводы. Москва, 1989 г. /
    • «Куда я вас приглашу...» (стр. 25)
    • «По улице идёт женщина...» (стр. 28)
    • «Синий и белый февраль...» (стр. 29)
    • «Воздух наполнен...» (стр. 36)
    • Осень (стр. 36)
    • «Маленькое пёрышко...» (стр. 39)
          Арво Метс. «Годовые кольца». Стихи. Москва, 1992 г. /

Комиӧдiс - Владимир Цивунин (кодi аттьӧалӧ веськӧдӧмысь коми гижысь Алёна Ельцоваӧс)
------------------------------------------------------------------------------------------------------------------------------------------------------------



* * *

Том нывъяс
чужӧмнаныс —
енэж,
тӧвру,
кокни кымӧръяс кодьӧсь.
Бӧрын наысь артмӧны
ылӧдчытӧм гӧтыръяс,
кодлӧн чужӧмъяс —
керкаяс,
пызан-улӧс,
сёян-юан новлӧдлан сумкаяс кодьӧсь.
Но налӧн нылукъясныс
чужӧмнаныс бара —
енэж, тӧв пӧльыштӧм
да тувсов шоръяс кодьӧсь.


* * *

Кытысь босьтны
та мында шудсӧ,
мед эськӧ став йöзлы,
кодъяс тыртӧны
карса эрдъяссӧ.

Быдӧнлӧн синъясын —
ӧшинь рамаяс костын
бобулӧн —
пессьӧ лолыс.


* * *

Кытчӧ ме тiянӧс кора?
Менам небӧгъясӧн тыр
келляӧ?
Кӧнi та мында мый овлӧ
кабала вылын...
Кӧнi збыль вылас —
нинӧм оз овлы...


* * *

Уличаӧд мунӧ ань —
гӧгрӧс,
сӧдз,
быттьӧ гӧгрӧс яблӧг.
Сiйӧ новлӧдлӧ ас пытшкас мортӧс.
Шудаӧсь аньяс,
кодъяс новлӧдлӧны ас пытшканыс
локтан олӧм.


* * *

Лӧз да еджыд февраль...
Ме ачым ог тӧд,
мыйла муна кыдз пу дорӧ
да видзӧда вывлань,
енэжлань.
Прӧста сулала,
сулала...


* * *

Сынӧдыс тырӧма
арся коръяслӧн
зарни югӧрӧн.

Весиг кажитчӧ:
кӧнкӧ неылын
вичколӧн юрйывъяс.


АР

Кыдз пуяс,
быттьӧ вӧсньыдик сисьяс,
ӧзйисны эрд сайын.


* * *

Ичӧтик кокни гӧнтор
ньӧжйӧник лэччӧ енэжсянь.
А лэбач оз тыдав.

(Вуджӧдӧм: 26-27 тӧв шӧр 2020 во)

-------------------------------
«Том нывъяс...»
«Кытысь босьтны...»
«Кытчӧ ме тiянӧс кора?..»
«Уличаӧд мунӧ ань...»
«Лӧз да еджыд февраль...»
«Сынӧдыс тырӧма...»
Ар
«Ичӧтик кокни гӧнтор...»