Владимир Цивунин. «Ышловзьӧм»
Кужтӧм кывйӧн гижӧмаӧсь кывбуръяс



+ + +

Кӧсйи лоны гижысьӧн,
Медым гижны комиӧн...
Зэв жӧ ёна мыжаси,
Удитi нин йӧмыны.
Велӧдчӧмыд сьӧкыд тай,
Дышиника мыччысьӧ.
Тӧдӧмлуныс сьӧктаммӧ,
Да и бӧр жӧ киссьӧ нин.

(25.06.2021)



+ + +

Гашкӧ, позьӧ нин комиӧн сёрнитны.
Кӧнкӧ торкся кӧ, — мый сэсся? Мед.
Гашкӧ, некод оз ёна и ёр нин. Да-й
Таысь кындзи и тӧлкыс оз пет.

Гашкӧ, гашкӧ... Да кодкӧд и сёрнитны?
Сэтшӧм гежӧда эм позянлун.
Меным, колӧк, и пондыны сёр нин-а;
Кадыс шуас: «А тэ кытысь?! — мун»...

(27.06.2021)



ӦТИ «КРЕСТЬЯНКАЛЫ»

Мый нӧ тэкӧд сэтшӧм кӧдзыд?
Тайӧ вӧлi оз нин ӧтчыд.
Бара чорыд кывтӧ кыла,
Бара кӧсъя мунны ылӧ.
А вот аддзысьлыны — ог;
Мыйла меным содтӧм шог?..

(27.06.2021, 13.09.2023)



+ + +

Кагульнича йӧктӧ челядь водзын,
Вӧлисти — и челядь, кӧчьяс моз.
Бур жӧ вӧвны збодерӧн да томӧн,
Кодыр вир-яй — ачыс вильышпоз.

Видзӧда та вылӧ ӧшинь сайӧ,
Кӧнi коркӧ сувтiс челядь сад.
Быттьӧ кыла: лолӧй кайӧ, кайӧ...
Весиг менам овлӧ татшӧм кад.

(24.08.2020)



«ЛЮБОВНӦЙ ЛИРИКА»

Тэ мунiн, и ме шогӧ уся...
(Сiдз колӧ сьывны. Сьӧлӧмкыв!)
Ме пӧшти бӧрда, кӧть и гусьӧн.
(А кӧть и он бӧрд, век жӧ сьыв!
И — водзӧ...)
                  Кусiс менам лунӧй.
Тэ вай жӧ пемыд сайсянь пет...

А то ӧд ме и ачым муна!
Ӧд, майбыр, паськыд вӧльнӧй свет.

(5.06.2021)



+ + +

    Эн ошйысь кывбурӧн, поэмӧн, —
Оз гӧгӧрвоны, кыдзи-мый эн сет.
    А ошйысь сьӧмӧн, сӧмын сьӧмӧн.
Оз гӧгӧрвоны бара? Да и мед.

(5.08.2022)



+ + +

Гожӧм. Чӧв-лӧнь. Мед и дышлун усис,
Тэрмасьны ог кӧсйи и оз ков.
Уна менам лолӧй, уна пузис...
Вай кӧть талун прӧстӧджыка ов.

Видзӧд гӧгӧр, кывзышт колипкайсӧ.
Бобув лэбзьӧ, дзизгӧ малямуш.
И эн тӧждысь сюйны ассьыд пайсӧ,
Быттьӧ олӧмас и нинӧм он нин куж.

Олӧм кывтӧ, миянкӧд ли, оз ли,
Енмӧн сетӧм козин — ставлы бур.
Торъя налы, кодi муын — посни,
Кодлы тӧвнас олӧмыс оз сюр.

(6.06.2021, бать-мамлӧн дачаын)



+ + +

Пипу вералӧ дзик быд корйӧн,
Ворсӧ-пӧртмасьӧ сылӧн мич.
И кор шувгӧ, и лӧнь — ӧтторъя...
Быттьӧ яндысьӧм нылыс шнич.

Мед кӧ некор он сывйышт сiйӧс,
Прӧста видзӧдлан да, и шань.
Майбыр, тыдалӧ ылысянь
Сылӧн тiралан мелi биыс.

Кӧсъя вӧлi ме ичӧт мойд
Коркӧ гижны вӧр пипу йылысь.
Сӧмын кӧсйӧмлӧн югыд войт
Лёкӧсь лунъясӧй понда — сылiс.

Дзикӧдз вунiс... Мем тайӧс жаль,
Збыль ӧд, помнита, мича вӧлi...
Сырмӧ пипулысь — абу чаль,
А — быд кор. Татшӧм пуыд мелi.

(24.06.2021)



+ + +

Кодкӧ шыасяс рытгорулын,
Сэнi — варовитӧны, сэн —
Небыд сералӧм. Миян муын
Гожӧм кажитчӧ жӧ тай мен.

Гӧгӧр дзизгӧны посни гагъяс,
Но и мед, быдӧн — ловъя лов.
Найӧ абу ӧд менам врагъяс, —
Ов жӧ, олӧмысь олӧм, ов!

Аттьӧ, мый со и меным вичмис
Кывны олӧмлӧн шондiбан.
Прӧста аддза да: кутшӧм мичыс,
Кутшӧм мичыс му вылас тан.

(26.06.2021, бать-мамлӧн дачаын)



+ + +

Ачым новлӧдла ассьым пай,
Быттьӧ нинӧмла ковтӧм мортыд.
Кодкӧ, аддза да, кӧсйӧ тай:
Мед пӧ дзебсяс нин ассьыс гортын.

...Но ме ола на. Видзӧдтӧг,
Мый литъёртъяслӧн визьяс тшӧтш жӧ
Ӧтдортчӧны ме дорысь век,
Быттьӧ ме гӧгӧр петiс петшӧр.

...Но ме ола. Кыдз ӧтка пу,
Кодi няргӧ, а вужъяс — содтӧ.
А литъёртъясӧй менам — тьпу! —
Мед и дзебӧны ловъя морттӧ...

Ме Куратовӧс лыддя, мый
Сэсся колӧ (ӧд верми, кужи);
Менӧ нималӧм оз нин кый,
Но и менам ин — абу кушин.

(24.06.2021)



ОЛIС АНЬ...
                                    Александра Мишариналы

Олiс жӧ тай коми ань поэтӧн,
Унаторйысь ышловзис да бӧрддзис,
Унаторйысь кывлiс радлун петӧм...
Менам лолӧй тшӧтш сы бӧрся вӧрзис.

Жаль, ме сiйӧс кыдзкӧ сёрӧн лыддя,
Кӧть и эм ми костын ловъя сунис.
Кӧсйи эськӧ кутны чоюк пыдди,
Сӧмын сiйӧ — таладорсянь мунiс.

Радейтiс кӧть мелiлун да мичлун,
Да ӧд уна мӧй ми кужам асьным...
Сылы кага вайнысӧ эз вичмы, —
Вай кӧть ми кутам сы дорӧ мелiасьны.

(20.10.2021)



* * *

Коймӧд лун нин зэрӧ, зэрӧ.
Ставыс ульсалӧма сiдзи,
Быттьӧ локтiс арлӧн пӧра.
Весиг ывла абу мича.

Мый тан вӧчны? — вошӧ юрӧй,
Ньӧти кӧсйӧм абу лолын.
Мыйкӧ син улӧ и сюрӧ, —
Да ӧд ӧмӧй збыльысь колӧ?

Кутшӧм могӧн дышлун венам?
Кыдзи петны тайӧ руысь?
Ок и гажтӧмчывлӧ меным.
Быттьӧ воштi олан туй визь.

(22.06.2022)



ЫШЛОВЗЬӦМ

Сiйӧ кӧ и вӧлi —
Быттьӧ эз и вӧв.
Сiдзсӧ шань да мелi,
Сӧмын — руа зэв.

Матын, а ки улас
Босьтчывны он лысьт.
Кыдз Куратов шулiс, —
Лэбзьӧ гоньявмысьт.

(13.06.2022)



+ + +

Ме пола кувны, татшӧмыс ме морт.
Кӧть дзугыльтӧдӧ оз нин сӧмын горт.
Ме пола, мый ог удит мыйкӧ вӧчны,
Мед лолӧс ортсӧ кокниджыка лэдзны.

И быттьӧ менӧ водзӧс ёна личкӧ,
А керны — мый нӧ? Оз шу весиг вичко,
И висьтасьӧм мен отсалас ӧдвакӧ.
Со татшӧм морт ме. Быттьӧ шогсян рака.

И тадзи ковмас водзӧ меным овны —
Век мыйкӧ вӧчны нисьӧ повны?
Пыр майшасьны — и ставыс менам сям?
А кӧсйи лоны — турун быттьӧ, рам...

(27.06.2021)



КОМИ КЫВЙӦН...

Мыйта ме песся, ӧд сизимӧд во!
А нинӧм олӧмӧдз сiдзи-й эз во.
Кыдзи кӧть донъяв, а век жӧ мем шог:
Лыддьыны кужа, а сёрнитны — ог.

(3.08.2023)



+ + +

Кутшӧм мичаӧсь кымӧръяс талун, —
Эськӧ мӧвпалiг видзӧдi век:
Эм ӧд кутшӧмкӧ олӧмыс налӧн,
Со и лэбӧны сэн тэрмасьтӧг.

А тэ улыссянь чӧв олiг аддзан
Миян енэжлӧн збыльвывса мойд:
Со кыдз кывтӧны надзӧник-надзӧн, —
Сэнi некодӧс некод оз дойд.

(16.05.2023)