Байтулман дунял


ГIумруялъул гьокко буго гирулеб,
Лъаларого жиндир унеб бакI- адрес,
ГьетIгьетIи гIемераб нухда кинигин,
Цин дун цеве тIамун, цин дица нахъ цIан.

Чан бихьичIеб - лъачIеб дий баянлъараб,
Чан гIадалъе щвечIеб дида бичIчIараб,
Бице дий гIадамал абадиялъго
БичIчIулареб бугеб щай инсаният?

Чваххулеб ицц буго гIумру чиясул,
ГIумруялъ гьекъонги къеч буссунареб.
Буго гьури гIадаб цо балагьидал,
Цо рахъ ккун пулареб, къойил хисулеб.

Чан хиси дандчIвараб, бихьараб дида,
Борхьил, царал гIадаб, магIлунул гIадаб. 
ГIумру мискинасул тIегьан щоледухъ
Щай мун хисулареб, байтулман дунял?

Ралъдал буран гIадаб гьалакаб гIумру,
Берал кьурал гIадин кье дагьаб нурги.
ТIухьил гулла гIадаб согIаб дуниял,
Бохдул кьурал гIадин кье лъезе бакIги.

РитIукълъи лъалареб, тIекъаб дуниял,
Дуй дурго лъимал щай ращадал гьечIел?
Гучаб ралъад гIадаб, цIоб дагьаб къисмат,
Къадар щай щивасе дур цого гьечIеб?

Цоял щай рухIулел цIадул бомбабаз?
Цогидал щай ругел кепал гьарулел?
Гьардарас рижидал рижаралшинал
Ращадал гурищха рижун рукIарал?

ЧIорогоял жалин дур гьел суалал
ЧIанда цIалкIугеян, гIенеккичIого,
ГIумруялъул гьокко буго гирулеб,
Лъаларого жиндир унеб бакI -  адрес...