[1913 – 1995 вояс]
Михайлов Игорь Леонидович. Роч кывбуралысь, вуджӧдчысь. Чужис 1913 воын йирым тӧлыся 1 лунӧ (важ ногӧн) Петербургын, стӧчджыка кӧ - Царскӧй селоын. Велӧдчис Ленинградскӧй университетын. Служитiс армияын. Нелямынӧд вояс заводитӧм дырйи 58-ӧд оланпас юкӧд серти веськалӧма дзескыдiнӧ да сэсся куим во мырсьӧма Печорскӧй лагерын. Неуна бӧрынджык, Комиын жӧ - Жешарт посёлокын, тӧдмалiс коми поэт Серафим Поповкӧд, кодкӧд найӧ уна во чӧж ёртасисны, да вочасӧн вуджӧдiс роч кыв пытшкӧ зэв уна сылӧн (дай мукӧд авторлӧн) коми кывбур. Сэсся дас во кымын олiс Таганрогын, а 1957-ӧд воын бӧр воис Ленинградӧ. Сэнi жӧ и кулiс 1995 воын.
Ӧтчыд (тайӧ вӧлi кӧнкӧ 1988 воын нин) ме тшӧтш жӧ аддзывлi Игорь Михайловӧс, кор сiйӧ локтiс Сыктывкарӧ «Мемориал» ютырлӧн корӧм серти. Да зэв жӧ забеднӧ меным вӧлi, сы вӧсна мый та лунӧ ми гӧтыркӧд ёна тэрмасим да, эг и удит босьтны сьӧрысь сылӧн «Золотые имена» (Зарни нимъяс) кывбура небӧгсӧ, кодӧс та пӧрйӧ ме тшӧкыда нимкодьпырысь лыдди, да эг вермы корыштны сiйӧс кырымасьны, кӧть и бура дыр дзик орччӧн пукалiм пыдди пуктана авторкӧд. Со татшӧмыс олӧмныд и эм...
(Унджык жӧ тӧдмавны поэт йилысь позьӧ, шуам, танi: Антонина Попова. Об Игоре Михайлове).
Авторыслӧн кывбур:
• «Два параллельных облака...»
Игорь Михайлов. «Золотые имена». Книга новых стихов». Ленинград, 1986.
Комиӧдiс (кыдзи кужiс) - Владимир Цивунин
--------------------------------------------------------------------
* * *
Кык вежӧнасьны вермытӧм кымӧр
дыр ӧшалiсны енэжын
шондi югӧръяснас югъялiгмоз:
ӧтиыс — ловзьытӧм-зумыд,
мӧдыс — кокни да зэв лӧсьыдиник.
Но найӧ эз аддзывлыны ӧта-мӧдӧс
и эз гӧгӧрвоны,
кыдзи жӧ найӧ вывтi мичаӧсь.
Зато кор ӧти на пиысь сылас,
мӧдыс оз кут тӧдны та йылысь. *
———
* Тайӧ кывбурсӧ, кыдзи-й некымын мукӧдӧс, поэт гижӧма сылӧн муса гӧтыр кулӧм бӧрын.